✒️विश्वनाथ महामुने महागाव (Mahagaon विभागीय प्रतिनिधी)
महागाव(दि.16 जानेवारी) :-
स्थानिक श्री विठ्ठल रुक्मिणी महाविद्यालय सवना (जि. यवतमाळ) येथे १२ जानेवारी २०२६ रोजी राष्ट्रमाता राजमाता जिजाऊ आणि युवकांचे प्रेरणास्थान स्वामी विवेकानंद यांची जयंती मोठ्या उत्साहात साजरी करण्यात आली. हा दिवस ‘राजमाता जिजाऊ जयंती’ आणि ‘राष्ट्रीय युवा दिन’ म्हणून महाविद्यालयात विविध उपक्रमांनी साजरा झाला.
कार्यक्रमाचे स्वरूप आणि उपस्थित मान्यवर
कार्यक्रमाच्या अध्यक्षस्थानी महाविद्यालयाचे प्रभारी प्राचार्य प्रा. नासिर शेख सर होते. प्रमुख पाहुणे म्हणून प्रा. जैस्वाल आणि प्रा. कोमल गुप्ता यांची उपस्थिती लाभली होती. प्रारंभी मान्यवरांच्या हस्ते राजमाता जिजाऊ आणि स्वामी विवेकानंद यांच्या प्रतिमांना पुष्पहार अर्पण करून अभिवादन करण्यात आले.
कार्यक्रमाचे प्रास्ताविक प्रा. डॉ. पंकज वामनराव चौधरी यांनी केले. त्यांनी आपल्या प्रास्ताविकात राजमाता जिजाऊंच्या संस्कारांचे महत्त्व आणि स्वामी विवेकानंदांच्या विचारांची आजच्या काळात असलेली गरज अधोरेखित केली. युवकांनी या दोन्ही महापुरुषांच्या विचारांचा वारसा पुढे नेला पाहिजे, असे मत त्यांनी व्यक्त केले.
प्रमुख पाहुणे प्रा. जैस्वाल यांनी स्वामी विवेकानंदांच्या जीवनातील प्रसंगांवर प्रकाश टाकला, तर प्रा. कोमल गुप्ता यांनी राजमाता जिजाऊंनी छत्रपती शिवाजी महाराजांना दिलेल्या शिक्षण आणि मूल्यांचे विवेचन केले.
आपल्या अध्यक्षीय भाषणात प्रा. नासिर शेख सर म्हणाले की, “राजमाता जिजाऊंनी स्वराज्याचे स्वप्न पाहिले आणि ते प्रत्यक्षात उतरवण्यासाठी पिढ्या घडवल्या. त्याचप्रमाणे स्वामी विवेकानंदांनी भारतीय संस्कृतीचा डंका सातासमुद्रापार वाजवून तरुणांना ‘उठा, जागे व्हा आणि ध्येय प्राप्त होईपर्यंत थांबू नका’ हा मंत्र दिला. आजच्या तरुणांनी सोशल मीडियाच्या युगात भरकटू नये, तर या महापुरुषांच्या विचारांचे पाथेय घेऊन प्रगती साधावी.”
कार्यक्रमाचे अतिशय ओघवते सूत्रसंचालन श्री अजिंक्य चंद्रवंशी यांनी केले. कार्यक्रमाच्या शेवटी कु. अमिषा नाहातकर यांनी उपस्थित सर्व मान्यवर, प्राध्यापक वृंद आणि विद्यार्थ्यांचे आभार मानले.
या सोहळ्याला महाविद्यालयातील सर्व शिक्षक, शिक्षकेतर कर्मचारी आणि मोठ्या संख्येने विद्यार्थी उपस्थित होते. राष्ट्रगीताने कार्यक्रमाची सांगता करण्यात आली.
